Sir 30

b30.21-25Aga 11.9-10

Waneigini baya hangu handaya ho holene ngago ogo

1 Abame ibu waneigini gubalini ho heagua nde waneigini bolebira. Ani biragola mani waneiginime ibu aba mo turu holebira. 2 Abame waneigini mani turu helonaga ayu baya hangu lawai haga ka. Ani bialu damene dewa biru ngagoria wane igininaga te dewa laga ka. 3 Waitigirume waneigini kago de hondowa ti dimagoli ho helo waneigini aba ibugua baya hangu mana laga ka. Ani biragome aba ibuni ibu nenege bu karunaga deni mini lene mbira holebira. 4 Aba ibuni nahome kangi ibu waneigini bu karu hondowa turu ho birulebira. Ani biruwa ibu homolene horo tagira ibirangi ibuni miniha genda nayi homolebira. Ibu homedeha waneiginime ibu hene ngagoria ho aribia holobada lo manda bialu genda naheore homolebira. 6 Heneneore ibu waneigini ha aribia haragome ti waitigi abala hayaru pani ba abala nenege howa mbirale ti aba biamogo biagaru tigua biamogo bigi bialu holebira.

7 Aba kagome ibu waneiginihondo hendore howa ibunaga dere emene bidaru kabu bia hayagola waneiginime dugu emene biyagua aba ibu manga haga ka. 8 Nogo hosi kago baya hangu biawai nahayagua nde ibu mine halu gabua holebira. Anidagua dege waneigini mana nahale hene heagua nde ibuni hame ledagoha pupebe bialu haga holebira. 9 Í̠naga waneiginime í̠hondo hale harago e̱ dege laga hariyagua nde horo mbirungi í̠ mo durula holebira. Libu haru gini bialu haga haribiyagua nde horo mbirungi í̠ mo genda holebira. 10 Í̠ igini kagola oba nahabe. Ibugua í̠ genda mo ngiragola mani í̠ni dara ho howa keba halu birulene wuligo nahabe. 11 Ibu igiri emene dege kangi ibuni hame ledagoha helo wanahalimu. Wene igiri emene kangi mana lalu tibume bolene nga. Mani anda halu puwa í̠naga bi larego hale nahe mine hama ibaga bulebirago ayu wene kangi bo gangu lolene nga. ^{▼▼(30.11-12)Mbuga alatawe gilibu wini ngagoha bi maru hobane ogoniha gilibu winigo nga. Bi ogoni ogodagua leda. Ibu wene igiri emene kangi ibuninaga hame ledago talialu helo yupe nahabe. Ani bialu ibu ko birago bialu helo í̠naga de paiho holene nawi. Í̠ni wene igiri dalihe kengi ibu baya hangu handaya ho halu ibu wene gali kangi tibume minu babe. Mani ibu mine halu í̠naga bi hale naharagola í̠ genda halu tandaga holene tagira ibulebirago ayu mo tiga bibe, leda.} 13 Í̠ igini kago baya hangu handaya ho howa mana bayale bulene ngago lawai holene manga nahe baya hangu lawai habe. Mani ibugua í̠ mo taga holene wulebirago ayu howa mo tiga bialu holene nga.

Í̠naga tingini baya hangu handaya ho holene nga lenego ogo

14 Yagibano tinaga tingini hongohe agali homogo karunaga tingini gedeore howa warago tara tara balu haga ka. 15 Tingini ibu galoneale mbira muni ngolo ngaru nagalone lowa bolangua hene nga. Tingini hongohe maruale ngaru bibahende bolangua hene nga. 16 Heneneore tingini ibuha warago mbira nawi howa hongohe heagua ibu galone duniniore mbira kagola wali agali turu ho haga. 17 Ainde í̠naga tingini ibu warago tara tara balu mo ko halu haabo hagayagua nde abale homalu homaliha baya hangu ha̱lo haabobo bu holene nga. 18 Ai mbirali warago bo ngagonaga tomo yu pialu keria ibugua tomo ogoni nabe naheyagua nde tomo ogoni wali agali homayaru tinaga loma bu yalu homaliha pialu yu wahalu dai biradagua bulebere. 19 Dama wabu heledagohondo ira lini bayaleru aginaga do loma bu mialu harilibe. Ibugua mbirale mbira nabe nahebi nga yabe nahebi ngago ndobe. Wali agali warago timbuni Anduane Homogoha howa ibini mo yu karu tibi nde tomo nolenebi nga yulenebi nakarulapeore holebira. 20 Tomo bayale ngaru tinaga deme handa hondowa tinaga bu miniha noa halu nabe nahedagola genda timbuni holebira. Agalime wandari baya bedago de hondowa ibu daubulene hame lowa miniha dimagoli halu mini burugu lo hagagobi holebira.

Wali agali turu ho karu ti bayale holebira ledago ogo

21 Genda bu ngarume í̠ bope nahelo halu í̠ninaga hame ngegome í̠ mo ko halu bope helo nahabe. ^b 22 Wali agali turu ho haga karu ti bayale halu ti mali luore dindini holebira. 23 Í̠ni hendore hole í̠naga miniha mo turu howa habe. Bu miniha genda halu mini burugulo holeneme wali agali dewa mo ko hai halu ti biamogo nabiagaorego manda buwa í̠naga bu miniha genda ngago mo wahalu habe. 24 Mana kira dimagoli holene keba holenelame wali agali abale balu home laga ndobe. Bu miniha genda yu kagome wali agali abale mo wahe haga nga. 25 Heneneore wali agali turu ho karu ti tomo damene bibahende hame lai haga ka.